🚨 LAJMI I FUNDIT | UEFA godet Serbinë: 129 mijë e 500 euro gjobë dhe stadiumi pa tifozë!

UEFA dënon rëndë Federatën Serbe të Futbollit për shkelje të shumta, përfshirë sjellje diskriminuese, mesazhe të papërshtatshme dhe shpalosjen e një baneri në përkrahje të kriminelit të luftës Ratko Mladiq.

Federata e Futbollit të Serbisë është përballur me një sërë sanksionesh disiplinore nga UEFA, pas shkeljeve të evidentuara në ndeshjet kundër Greqisë dhe Holandës, si dhe në përballjen e zhvilluar në udhëtim ndaj holandezëve.

Si pjesë e dënimit, Serbia do ta zhvillojë ndeshjen e ardhshme kundër Gjermanisë pa praninë e publikut të zakonshëm. Në stadium do të lejohen fëmijët, ndërsa të pranishëm do të jenë edhe 2.000 tifozë gjermanë.

Por ky nuk është i vetmi ndëshkim për federatën serbe.

REKLAMË

Për shkeljet në ndeshjet si vendase, Serbia është gjobitur me 50.000 euro për sjellje diskriminuese, 22.500 euro për mesazhe të papërshtatshme, 2.000 euro për përdorimin e mjeteve piroteknike dhe 15.000 euro për hyrje në fushën e lojës.

Ndërkaq, për ndeshjen në udhëtim ndaj Holandës, UEFA ka shqiptuar edhe dy gjoba të tjera: 20.000 euro për sjellje raciste dhe 20.000 euro për transmetimin e mesazheve të papërshtatshme.

Në total, Federata Serbe e Futbollit do të paguajë 129.500 euro gjoba.

Sanksionet vijnë pas një vargu shkeljesh që kanë përfshirë edhe mesazhe e simbole të papranueshme në tribuna, duke e vendosur sërish futbollin serb përballë masave disiplinore të UEFA-s.