Budva pret liderët evropianë, Kurti dhe Rama pjesë e Samitit të Procesit të Berlinit

Bashkëpunimi rajonal, reformat evropiane dhe integrimi i Ballkanit Perëndimor pritet të jenë temat kryesore të takimit të nivelit të lartë në Mal të Zi. Në mesin e pjesëmarrësve janë edhe kryeministrat e Kosovës dhe Shqipërisë.

Liderë shtetërorë, përfaqësues të qeverive dhe drejtues të institucioneve ndërkombëtare do të mblidhen të enjten në Miloçer të Budvës, në kuadër të Samitit të Liderëve të Procesit të Berlinit, një platformë e rëndësishme për avancimin e bashkëpunimit ndërmjet vendeve të Ballkanit Perëndimor dhe Bashkimit Evropian.

Sipas listës së publikuar nga Qeveria e Malit të Zi, në këtë takim do të marrin pjesë edhe kryeministri i Kosovës, Albin Kurti, dhe homologu i tij shqiptar, Edi Rama. Pjesëmarrja e tyre vjen në një kohë kur integrimi evropian dhe forcimi i lidhjeve rajonale mbeten ndër çështjet kryesore të agjendës politike në Ballkan.

Në mesin e zyrtarëve të konfirmuar figurojnë kancelari gjerman Friedrich Merz, kryeministri i Kroacisë, Andrej Plenkoviq, kryeministri i Maqedonisë së Veriut, Hristijan Mickoski, si dhe kryeministri i Serbisë, Đuro Macut.

Marta Kos zhvillon takime me drejtuesit e Malit të Zi

Komisionarja evropiane për Zgjerim, Marta Kos, do të jetë gjithashtu pjesë e samitit, ndërsa gjatë qëndrimit të saj në Mal të Zi do të zhvillojë një sërë takimesh me përfaqësues të institucioneve shtetërore dhe aktorë politikë.

Agjenda e saj përfshin bisedime me presidentin e Malit të Zi, Jakov Milatoviq, kryetarin e Kuvendit, Andrija Mandiq, si dhe kryeministrin Milojko Spajiq. Në fokus do të jenë përparimi i vendit drejt anëtarësimit në Bashkimin Evropian, zbatimi i reformave dhe rëndësia e dialogut politik për përmbushjen e objektivave evropiane.

Gjatë vizitës, Kos pritet të takohet edhe me përfaqësues të opozitës malazeze. Ndërkaq, mediat në Mal të Zi kanë raportuar se ajo do të zhvillojë një takim edhe me kryeministrin e Kosovës, Albin Kurti, për të diskutuar zhvillimet e fundit në vend.

REKLAMË

Në fokus edhe investimet dhe ndërlidhja rajonale

Samiti do të mbledhë gjithashtu përfaqësues të institucioneve financiare dhe organizatave ndërkombëtare që mbështesin zhvillimin ekonomik, bashkëpunimin ndërkufitar dhe proceset integruese në rajon.

Në mesin e pjesëmarrësve janë drejtues të Bankës Evropiane për Rindërtim dhe Zhvillim, Bankës Evropiane të Investimeve, Grupit të Bankës Botërore, Organizatës për Siguri dhe Bashkëpunim në Evropë dhe Këshillit të Bashkëpunimit Rajonal.

Pritet që diskutimet të përqendrohen në forcimin e lidhjeve ekonomike, zhvillimin e infrastrukturës, bashkëpunimin në sektorin e energjisë dhe transportit, si dhe përshpejtimin e afrimit të vendeve të rajonit me standardet dhe politikat e Bashkimit Evropian.

Procesi i Berlinit synon të nxisë bashkëpunimin mes vendeve të Ballkanit Perëndimor dhe të mbështesë përgatitjet e tyre për integrim evropian, përmes projekteve të përbashkëta dhe avancimit të reformave.

Samiti në Budva pritet të shërbejë si një tjetër mundësi për koordinimin e prioriteteve rajonale dhe forcimin e dialogut politik mes liderëve të Ballkanit Perëndimor dhe partnerëve evropianë.